做啊四

昨晚仔仔要出席CCBA Inauguration Ceremony，要穿的西裝外套僅得的一粒鈕鬆甩落來，要我去急救，所以約了他中午在沙田新城市廣場飲茶，並帶埋針線及絞剪去，在酒樓縫好粒鈕。

仔仔請飲茶，這是18年來的第一次。其實他現時收入頗不錯，每個月我俾三千元生活費，而補習收入全部落自己袋儲起，現時身家已接近6位數字。去年5月滿18歲後，急急申請了張信用卡，到10月時又開了個股票户口，上個月前後買了兩隻股票，早兩日放了一隻有錢賺，所以請啊媽飲茶:)

不一樣的聖誕假期

自從升上小一後的六年小學生涯，仔仔聖誕節假期大部分時間都是温習，原因是放完聖誕及元旦，一返學就是mid-term exam。到中學，是考完mid-term才放聖誕節假，所以頭四年聖誕節假期，就由温習變為主力練琴了。到中五及中六，已在準備DSE公開試了。

今年的聖誕節假期特別長，由12月14日完sem開始放到今日才開學，接近一個月。而呢段時間一家並沒有外遊，仔仔有3日為支莊去不同地區籌款外，其餘時間就不斷地同中學同學、大學同學及莊員飯聚。還有的是---拍拖，女仔是讀同一間大學、同一個學系的同學。

大學五件事他做齊︰讀書、上莊、住hall、拍拖、補習。現時幫四個學生補習，三個中六(每星期上1.5小時)，一個中一(每星期上2小時)，其中兩個學生補數，是一齋上堂的。所以仔仔都好忙，時間真的需要管理得好好至得！

四天大假

老公四天大假話咁快已放完，四天基本上都在跟羽毛球打交道。

Day 1 兩公婆去食完自助午餐後，他去了紅館睇香港羽毛球超級錦標賽，睇到夜晚九點幾才結束。

Day 2 早上九點半落樓下會所打了三小時羽毛球，晚上八點半跟另一班人再去打兩小時(我就獨個兒去游水四十五分鐘)。

Day 3 早上兩公婆去飲茶，飲完茶他又去紅館睇羽毛球超級錦標賽，下午一點睇到十一點幾才結束(我就去了Sogo，趁大減價買了兩個枕頭、一套四件廚具及超市買了一堆食物)。

Day 4 早上九點半又落去打了三小時羽毛球(我繼續游我的水)，下午齊齊留在家中hea。

清假

臨近年尾，老公努力在清大假。上星期五仔仔中學畢業禮放了一日，今日起至24號連續放四天。下個月11號起再放10天，至27/12才返工，但仍然清唔完今年的大假。

今日倆老去Cafe Kool食自助午餐，去之前我少不免要游水45分鐘消吓脂先。上一次去呢間食自助餐是一家三口，7月12日----仔仔DSE放榜日子。當日放榜成績雖然跟預期有出入，是有點失望，但也沒有什麼大不了，照去大吃一餐，亦在當日已決定留港讀大學。

食完自助餐後，老公去睇羽毛球錦標賽，我興趣麻麻，選擇回家hea。

畢業典禮

上星期五，仔仔中學舉行畢業典禮。晚上六點開始，老公和我也有出席。由於他上了支莊，上星期是promotion period ，每日要四場dem beat ，當日5:30pm完了dem beat才趕返學校換衣服，幸趕得切上台。

今個月仔仔非常忙碌，test/mid-term exam之外，參加了一個case competition ，又練dem beat，又補習賺取零用錢。對於上莊dem beat我覺得有些無聊，浪費時間，但另方面亦睇到他身為president，過程中有不少得着。當然更實際的是，透過上莊有分加，確定明年繼續有宿住，不用每日舟車勞頓。

今個月頭患了急性腸胃炎，急急出旺角睇醫生，疴嘔了四日先好返，有日特意煲了湯水，約他在沙田新城市廣場X斗食粥麵，並給了湯他帶回宿舍飲。

六月中購買的西裝用作graduation dinner穿著，上星期畢業典禮再穿著返，條西褲鬆了不少。DSE後大吃大喝重了10磅有多，開學後至今已瘦了一大個圈，早已瘦回了。

屋企似酒店

個多月的大學住宿生活(通常星期五回家，星期日或一先返學校)，終於感受到「家」有多好！

仔仔話覺得屋企好似住酒店咁舒適，原因是屋企張床舒服過宿舍好多，廁所亦好用好多，仔話宿舍沐浴房間格好窄，要側身先出到。食物方面令他搖頭嘆息，話寧願價錢收貴點、食物質數好一點。食得最多的是善衡canteen燒味飯，覺得最好食，有時寧願食麵包、三文治好過食難食的飯。我問仲有呢？屋企仲有媽咪服侍周到喎！仔同意，並補充話屋企仲有個靚景呢。

昨日lunch後如常出去同兩個學生補習，一個住荃灣中六學生，另一個住青衣中一師弟，最近幾次家長好體貼，叫埋糖水請他食，仔好窩心:)

昨日補完習後，由於報名參加個case competitation，幾個同學約好8點在學校商談準備，所以陪他在青衣城匆忙dinner後返回學校了。今日冇堂上，會留在宿舍温習。

期待已久的雪櫃

開學住宿了兩星期後，仔仔不太想繼續去canteen食早餐，想好似以往在家的早餐模式︰白/麥方包加杯鮮奶/朱古力奶，或鮮奶加粟米片，所以想有個迷你雪櫃放鮮奶、生果之類。仔見room-mate每朝早用麥精加粟米片做早餐，問他唔難食嗎?

9月18日落order訂購可容量5L、保冷低至零度的雪櫃，等了又等，終於有貨喇，今日拎去宿舍跟room-mate共用了。