被牽著鼻子走

近三個月，我深深地感受到自己被仔仔牽著鼻子走。我的想法是，努力做好當下，沒有可能的就無謂浪費時間及精力，但他卻話要將沒有可能，化為無限可能。那就由他吧！

****************************

早前仔仔同我講，他真的很喜歡讀書，但不喜歡考試，亦對近幾個月的操練已感到厭惡，很想快點入大學，過另一種學習生活。昨晚又同我講，話他將喜歡讀書呢番說話講給同學知，同學反應好大，即時戲稱他做「學神」。我問學神點解？跟學霸有什麼分別？仔仔笑住話學神比學霸層次更高。

************************

仔仔的personal statement已draft好，在英國讀year 3的師兄給了些意見，並將自己當年那份personal statement透過學校career counselor給仔仔參考。修改後再給幫他寫reference letter的老師俾意見，然後再交給其中一位career counselor作最後修改。

嚇一大跳

星期四朝早仔仔如常7點幾出門返學，11點左右校務處打電話來，話仔仔冇返學，當堂嚇我一大跳，立即打佢手機。原來MA有嘢做，頭幾堂都在禮堂。年紀漸大真係唔嚇得，好彩仔仔有即時聽電話。

下星期開始，各科測驗將接踵而來。已知下星期一、二放學後全級留校測中、英文，而星期三就自己班測通識。

今學年通識科又轉老師，仔仔話呢位老師過去幾年都只教中六，亦是校內最好的通識老師。由暑假開始，仔仔已沒有再補通識，打算到DSE前再去補習社上幾堂revision course就算。

新學年

上星期五正式上堂，放學返來取出兩個破爛公文袋，是Econ past papers，由仔仔出世嗰年(1999)HKCEE至2015年DSE。我驚訝問咁多做得完？仔答影咗至算喇。再問影完幫你換個新淨公文袋才還俾老師好唔好？仔卻話唔需要喇，見他語氣已有點煩躁:(

去年仔仔選擇一個中間較佳座位坐，今年卻選擇偏僻角落位，玩自閉？

今年班內有四位同學已出國讀書，仲有一位未返學，未確定。仔話原來班內約有一半人已考IELTS，有同學好有興趣知他上完補習才去考，成績將會如何。仔卻好有興趣知有位同學校內英文攞5*，跟自己同一日考IELTS，成績又會如何。

去年新買的校服褲開學時穿著仍有點過鬆，要在褲頭兩邊褶起用針線縫實，今年覺得褲頭緊咗，要將褶起的放返落來。暑假食得太豐足吧？仔仔話已有個小肚腩，要它盡快消失:)

暑期功課

剩返一日就開學，只得一份的通識暑期功課竟然仍未做:(

從通識份暑期功課睇到，開學兩星期之後的兩個月，每兩星期就會有一次quiz，相信其他科目也是一樣頻密。而早於放暑假前已收到份通告，開學兩星期後開始，每逢星期一放學後每科輪流測驗。問仔仔有否開學焦慮症？他答沒有，那就安心了。

考完IELTS

仔仔今日考IELTS，上午考reading、writing及listening，下午考speaking，希望有滿意成績吧，不用再考第二次，9月9日會知成績。

昨日得知有宗寨卡病毒個案，真的想隔離埋老公，唔俾佢返屋企。老公好似唔覺一回事，輕描淡寫話都唔同層樓，仔仔插嘴話但搭同一部電梯嘛:(

開始暑期課程

前日仔仔的暑期課程正式開始。當日1:30pm補中文live班，2:45pm放學，跟住去附近公共圖書館溫習，因為5:45pm仲要上兩個半小時的IELTS。這是17年來仔仔首次在公共圖書館自修室温習，他的感受是：1) 氣氛太嚴肅，有種壓迫感；2) 張枱好細、座位逼夾。我問咁下星期日仲去唔去自修室温習？仔答去。

盡管睇睇是否大隻講！

正能量

話說仔仔在補習社補中文，每期收到筆記都會附送一張卡。個人覺得字句充滿正能量，亦很有鼓勵作用。仔仔抽了幾張較有意義的卡，貼在自己書枱上的壁佈板，用作鼓勵自己。

雖然，中文仍是他的最大絆腳石，亦可能是致命傷，但，盡力而為吧！