四天大假

老公四天大假話咁快已放完，四天基本上都在跟羽毛球打交道。

Day 1 兩公婆去食完自助午餐後，他去了紅館睇香港羽毛球超級錦標賽，睇到夜晚九點幾才結束。

Day 2 早上九點半落樓下會所打了三小時羽毛球，晚上八點半跟另一班人再去打兩小時(我就獨個兒去游水四十五分鐘)。

Day 3 早上兩公婆去飲茶，飲完茶他又去紅館睇羽毛球超級錦標賽，下午一點睇到十一點幾才結束(我就去了Sogo，趁大減價買了兩個枕頭、一套四件廚具及超市買了一堆食物)。

Day 4 早上九點半又落去打了三小時羽毛球(我繼續游我的水)，下午齊齊留在家中hea。

清假

臨近年尾，老公努力在清大假。上星期五仔仔中學畢業禮放了一日，今日起至24號連續放四天。下個月11號起再放10天，至27/12才返工，但仍然清唔完今年的大假。

今日倆老去Cafe Kool食自助午餐，去之前我少不免要游水45分鐘消吓脂先。上一次去呢間食自助餐是一家三口，7月12日----仔仔DSE放榜日子。當日放榜成績雖然跟預期有出入，是有點失望，但也沒有什麼大不了，照去大吃一餐，亦在當日已決定留港讀大學。

食完自助餐後，老公去睇羽毛球錦標賽，我興趣麻麻，選擇回家hea。

畢業典禮

上星期五，仔仔中學舉行畢業典禮。晚上六點開始，老公和我也有出席。由於他上了支莊，上星期是promotion period ，每日要四場dem beat ，當日5:30pm完了dem beat才趕返學校換衣服，幸趕得切上台。

今個月仔仔非常忙碌，test/mid-term exam之外，參加了一個case competition ，又練dem beat，又補習賺取零用錢。對於上莊dem beat我覺得有些無聊，浪費時間，但另方面亦睇到他身為president，過程中有不少得着。當然更實際的是，透過上莊有分加，確定明年繼續有宿住，不用每日舟車勞頓。

今個月頭患了急性腸胃炎，急急出旺角睇醫生，疴嘔了四日先好返，有日特意煲了湯水，約他在沙田新城市廣場X斗食粥麵，並給了湯他帶回宿舍飲。

六月中購買的西裝用作graduation dinner穿著，上星期畢業典禮再穿著返，條西褲鬆了不少。DSE後大吃大喝重了10磅有多，開學後至今已瘦了一大個圈，早已瘦回了。

屋企似酒店

個多月的大學住宿生活(通常星期五回家，星期日或一先返學校)，終於感受到「家」有多好！

仔仔話覺得屋企好似住酒店咁舒適，原因是屋企張床舒服過宿舍好多，廁所亦好用好多，仔話宿舍沐浴房間格好窄，要側身先出到。食物方面令他搖頭嘆息，話寧願價錢收貴點、食物質數好一點。食得最多的是善衡canteen燒味飯，覺得最好食，有時寧願食麵包、三文治好過食難食的飯。我問仲有呢？屋企仲有媽咪服侍周到喎！仔同意，並補充話屋企仲有個靚景呢。

昨日lunch後如常出去同兩個學生補習，一個住荃灣中六學生，另一個住青衣中一師弟，最近幾次家長好體貼，叫埋糖水請他食，仔好窩心:)

昨日補完習後，由於報名參加個case competitation，幾個同學約好8點在學校商談準備，所以陪他在青衣城匆忙dinner後返回學校了。今日冇堂上，會留在宿舍温習。

期待已久的雪櫃

開學住宿了兩星期後，仔仔不太想繼續去canteen食早餐，想好似以往在家的早餐模式︰白/麥方包加杯鮮奶/朱古力奶，或鮮奶加粟米片，所以想有個迷你雪櫃放鮮奶、生果之類。仔見room-mate每朝早用麥精加粟米片做早餐，問他唔難食嗎?

9月18日落order訂購可容量5L、保冷低至零度的雪櫃，等了又等，終於有貨喇，今日拎去宿舍跟room-mate共用了。

為食鬼

今個漫長暑假，陪仔仔食咗無數次酒店自助午餐、下午茶自助餐、放題，食到上癮，好彩keep住勤力游水，否則變大肥婆。今、明兩天老公放假，又心思思想兩個人去食，訂咗Cafe Too。

仔仔知道後流曬口水，今朝10點左右whatsapp俾我，話今天2:30pm要上的Economics for Business Studies I(呢科Business School所有學生都要讀)，高中Economics已讀過，亦已備好課，而且呢科不用take attendance，所以都想過來金鐘一齊食。我表示歡迎，立即打電話去改為三位。老公鬧我是魔鬼，誘惑仔仔走堂:(

開始大學生活了

聯招放榜後，仔仔補習之餘，已忙於新生迎新日、申請書院、Ocamp、Reg科及一連串的飯局聚會，今天帶埋行李喼開學了。

由於住得遠，不想每日花費三小時在交通上，仔仔一心希望能申請到全宿，可惜唔成功。為求Year 2能住多一年宿舍，他Year 1會上莊，確保Year 2夠分住到宿。

考完

今日DSE最後一科考完，只剩餘5月12日的英文口試了。

5月7日大學有面試，要準備1-page resume，30分鐘interview及 30分鐘student sharing。13至17日幾個同學一齊去台灣遊玩，返港後開始準備IAL Maths。

去年7月主動關閉了Whatsapp訊息提示通知，今日重新啟動了。

不幸事件

4月8日考英文聆聽及綜合能力卷，估唔到不幸事件發生在仔仔身上。

http://hk.apple.nextmedia.com/news/art/20170409/19984560

http://hk.on.cc/hk/bkn/cnt/news/20170408/mobile/bkn-20170408192317036-0408_00822_001.html

仔仔話自己平時做完呢份卷，都只剩餘很少時間。當日覺得份卷較平時稍深小小，所以所花時間亦多小小，但預計時間還是可以完成整份卷的。到叫停筆時，最後一題書信結尾未完成。

當日下午他心情麻麻，但亦懂得說可以做的已盡做。他自我安慰：呢份卷其他部分感覺好似做得唔錯，未完成那題佔的分數亦較少，所失的分數或者影響不太大吧？又，只是佔1/4卷，仲有其他三份卷，拉上補下，或者整體成績不太差吧？

口試

仔仔昨晚考中文口試，題目是：

以下哪一項更能象徵朋友？試談談你的意見。
眼鏡 地圖

仔仔選擇眼鏡，並話滿意自己的表現:)

中六last day

上星期五是仔仔中學最後一天，那朝早我吩咐他要好好享受，暫時將讀書事拋於腦後。

這六年來，令我最感謝學校的是，給予仔仔很多自由與空間、獨立與自主，校園生活算是頗為愉快、多姿多采；令我感欣慰的是，仔仔懂得在適當時候，將讀書放在重要位置，明白了前途、命運要由自己去操控。

還有33天就開始DSE筆試，4月1日考到4月29日。這段期間我可以為他做的事，除了煲多點湯水他飲之外，只有背後無限支持。
                                             6Y全班同學